السبت، 7 مارس 2009

هل أقتله ؟ أم أقتله؟

غريب أمر هذا العالم !!


غريب كل هذا الاستخفاف بمشاعر الآخرين خصوصا حين يكون الواحد منكم في أمس الحاجة لقضاء أمرٍ ما .. ويصيبه نوع من هذا الموقف الذي (يبط الـچبد) ...

ذات يوم كنت في ذروة الاندماج في مكتبي بما هو مناط لي من أعمال هذا اليوم ..

وفجأة ..
شعرت بأن هنالك بعض الوحوش (طالعين سباق سرعة) في أعماق معدتي .. كنت أشعر تماما بكل ( التفحيطات ) التي تدور بالداخل ..

غريب جدا !! فأنا لم أتناول هذا اليوم شيء خارج عن العادة ! أو شيء يكسر الروتين ..
كوب الشاي بالحليب هو ذاته منذ الصباح يعده لي (الهندي فيصل) ..

هذا العامل تم تخصيصه ليقوم بتزويدنا بكل احتياجاتنا من المطبخ (ماء، شاي، كوفي، شربت، ) وغيره ..

إلا أن (نداء الطبيعة) كان يناديني بشوق عارم !!
كان يصرخ بأعلى إمكانياته التعبيرية وهو دليل على اشتياقه إليّ (كاشتياق العجل إلى محالب أمه البقرة !!)

فما كان مني إلا أن ألبي هذا النداء بكل حفاوة ..
انطلقت كالسهم نحو باب (الحمام ) وبمجرد وصولي هممت بفتح الباب على عجل لكي لا تفوتني واقعة (الحدث الأصغر) .. وإذا بي اتقاطع عند الباب بيد العامل (الهندي فيصل) وهو في نفس اللحظة يحاول فتح باب الحمام !

قبل أن أتكلم هو بادرني بالكلام قائلا: " أرباب هذي حمام مافي ماي ) !!
قلت له : وماالعمل الآن ؟ أنا في حالة اضطرار شديدة !!
هز رأسه مموها بأنه لايملك الحل ..

تراجعت القهقهري نحو مكتبي وأنا مكسور الخاطر ! وآثار الخيبة مرسومة على ملامحي بكل تفاصيلها ..

جلست دقائق على مكتبي ..

إلا أن فيصل الهندي عاد إلي وهو (منسدحاً من الضحك ) ،
ويسخر مني قائلا: أرباب في ماي بس أنا في منتا يروح داخل حمام في واجد تكليف .. يعني بالمختصر قص علي !!

في رأيكم أذبحه ؟ لو أغطس راسه في الحمام لين يفطس أو يشرب ما تبوأ به هو هناك !!

آخر زمن !!

هناك 33 تعليقًا:

غير معرف يقول...

لا ينفعك قتله بشيء, و لا حتى ضربه, و لكن العين بالعين, فعليك بإيقاعه في كمين محكم, و أفضل شيء خداعه بعلكة مسهلة, و أنتضر حتى تقوم بعملها, و عندما تراه منطلقا كالسهم نحو بيت الراحة, و أهنيه, أنته و ضميرك, إما تعرقل له, أو تكون قفلت الباب و أخدت المفتاح, أو تسبقه للباب.........
بس نصيحة لا تأخره واجد وإلا, ماحد بيدفع الثمن غيرك

غير معرف يقول...

ههههههههه

تصدق ريحتني شقيق

من زمان ما شفت واحد يسوي فيك مقالب ههههههههههه

لا هذا فيصل يحتاج تكريم :P

غير معرف يقول...

السلام عليكم

ههههههههههههههههههههه

" سخرية القدر "

تعيش وتآكل غيرها

حتى الهنود قدروا عليك

تحيتي ..

بو محمد يقول...

هذا الله يسلمك دواه عزيمه على قلاص عصير باااااارد يسرسح مخلوط بسوية خروع و الا حلول تالي تقعد تفتر فيه البحرين كلها بالسيارة و لا توقف لين تشوف العرق يصبصب على يبهته و يرجف جنه سعفه هني تقول له اصرخ من قمة راسك و قول أويييه أويييه أوديك الحمام علشان يتكن
:-)
دمت و الأهل و الأحبة برعاية الله

غير معرف يقول...

ما عندك سالفة...

لخه طرااق قوي.. و اسدحه عرضيين هالسمبوسة هذا

هههههههههههههه

كبرياء وردة يقول...

في انواع اكل خاصة تسبب اسهال

عطه بدون لا يدري:D

اقصوصه يقول...

هههههههههههههه

لا شماته

اللهم لا شماته

والا حوبتك ها يا بو حوبه؟

هيييين ما عليه!

بعده عليك خط احمر !!

غير معرف يقول...

طال عمرك :


أحسن شي تبسطه بدست ينسيه منهو انت !
هالـ ....

عباس

غير معرف يقول...

اقتله مرتين لييييين يموت << لا تكفين الرحمه

و الا اقلك عطه مثل ما قالو الاخوان مسهل << بس اخاف ما يتأثر لانهم متعودين هالهنود !!


يلا تعيش و تأكل مقالب وقت الحاجه ,,
^^

غير معرف يقول...

ههههههههههههه ..
يعجبني هالهندي والله D:

عجل بس انتونه تسوون مقالب ودقات في الناس ..

شلون قص عليك لكن اني خبري يعني في حالات الطوارئ وخصوصاً حين تتعلق بالحاجات النفسية الملحة ،، لازم الواحد يجرب جميع الخيارات العويصة .. باختصار يعني اشرد بدون ما يدري عنك المشرف تبعكم وروح الى اقرب حمام !!

المهن عاد الحين لازم ترد ليه المقلب ،، يا الله مخمخها نفس ايام أول خوك هع هع هع هع

غير معرف يقول...

هههههههههههههههههههههههههه
مااا اصدق ان هندي قدر عليك... بيييه هذي نقطة سودة في تاريخك الحافل بالمقالب...
عاد نبي نعرف شلون بترد الصاع صاعين.


بنت ديرتك

غير معرف يقول...

ههههههههههههههه

يآآآع ..الله يخرب بيت مقآلبه

آبداً ماهي حلوه ولاهي في وقتها :S

بس تعيش وتاكل غيرهـا

وبيني وبينك تستاهل :P

علي يقول...

حسين الجمري

ههههههههه ذبحتني من الضحك بو علاوي خوش خوش تحريض في مكانه :D

علي يقول...

مجتبى
ايها الشقيق الملحد الأعظم
انت انسان مغرض ومتصيد في الماء (العكر) ووجب إقامة الحد عليك وجلدك 11 جلدة
ونقبل الاستئناف في الحكم وتخفيفه إلى 10 جلدات :D

\

علي يقول...

SomeOne

شفت / شفتين شلون؟
الدنيا تلف تلف وتدور لكن هذا كله من عين الحساااااد :P

علي يقول...

بو محمد

ههههه هذا انتقام اتوقع يخليه يعيد حساباته في المستقبل بالكامل :D



تسلم ياغالي

علي يقول...

جنان

لااااا مو زين حرام طراق واحد لازم اكثر :P

علي يقول...

كبرياء وردة

لا لا ما ينفع لأنهم متعودين على الفلفل :D

علي يقول...

اقصوصة

ترى كلما تتشمتين اكثر كلما تزيد الحووووبة حوبتين والبادئ أظلم ياستي:P

وش سالفة الخطوط الحمرا في كل مكان يطلعون لينا في السياسة وفي الدين وفي الدراسة وفي الاجتماعيات وحتى في المدونة

علي يقول...

عباس
شقيقي الظاهر باين عليك ناوي اروح فيها لا تنسى هذولين مواطنين واحنا مقيمين :D

علي يقول...

اسيرة اللوحة


اي والله ما يفيد لا مسهل ولا فلفل ابدا :D

علي يقول...

مساحات

هذا كل من طحنتكم علينا تتهمونا احنا بس اللي نسوي مقالب مع اني ما كنت اسوي مقالب انا فقط ادون التاريخ والاحداث:(

ولا يهمكم نردها له بس عطونا فرصة ونشوف شنو يصيرر:P

علي يقول...

بنت ديرتي

ايييييي الدنيا تلف تلف وتدور وترجع شفتين شلون؟؟

خلاص وإن عادوا عدنا :D

علي يقول...

فاطمة
أستاهل ها ؟؟

معليه

شكرا للتضامن ومن هذا الفال ليكم

حنان الأحمد يقول...

عادي الحياة تتطلب ان احنه نعيش ونجوف !!

لكن كن واثقاً " ان الله ما يطق بعصا " وووو مرده بيجي احد بيعطيه مقلب بطيحه في شر اعماله .. :P


و خيرها و بغيرها يا ولدي :P

غير معرف يقول...

السلاام عليكم

-------
اقتباس من الملا

SomeOne


شفت / شفتين شلون؟
الدنيا تلف تلف وتدور لكن هذا كله من عين الحساااااد :P

-------

" شفتين *** "

ههههههههه جن نغزات قامت تنضرب ، احنا مانحسد ، يمكن أنت حسدت نفسك والا شيء

وانت بنفسك قلت الدنيا تلف وتدور ، لربما هذا جزاك على الا تسوويه في خلق الله ، راواك هالهندي

تحية

غير معرف يقول...

هههه ياحرام يا علي بس مااوصيك لازم تساوي فيه مقلب كبيير

علي يقول...

حنان الأحمد

صادقة يا يمه كل ظالم وله يوووم :D


شكرا للمرور الجميل

علي يقول...

SomeOne

شفتين هذي عيون مو حد هذي عيون مغرضة :D

علي يقول...

جهاد

امممم خلاص وصيتك سنعمل بها :D

Life يقول...

آخر عمرك يآ علي هندي يسوي فيه مقلب :p

علي يقول...

life

هههه شسوي من هوان الدنيا شفتي شلون :(

حُـبي السَـرمدي يقول...

ههههههههه

يالله لو ما هالهندي صاير قريب منكم تمازحونه ما تجرأ يسوي جذي

وهالشي زين يعرفنا ان الهندون او العمال بكافة جنسياتهم ما هم الا بشر نفسنا والمعاملة الزينة تفيد ..~